4 سنين عدو من عمرى زى الطيف هما ايام الجامعة
اول يوم فى الدخول واستكشاف الاجواء ورؤية الفروق الفردية بين الناس الكتير الوان هدوم وعربيات وطريقة كلام اكنها لغات مختلفة مع ان كلها عربى بس بنلعب على الاكسون فى الكلام الى بتدلع ولى محافظة اوى والى والى جادة خالص والى عادية ومش شايفة اى حاجة مبهرة والى خافت وفضلت فى الصندوق بتاعها المقفول بتتفرج من الفتحة الصغيرة بتاعته
والخوف من المجهول هكون لوحدى ولا هعرف اعمل اصحاب
ابدأ انا ولا هما الى هيجو
بدءت لوحدى بس انا من النوع سريعة الاستقطاب بعرف اجمع ناس حوليا بتوفيع ربنا طبعا يمكن علشان باستمرار محتاجة فى حياتى فبأت مهارة يمكن وحياتى علمتنى ان دايما يكون عندى بدائل من الاصحاب توفيق ربنا كان كبير اوى عليا
اتصحبت على احسن ناس فى الدنيا غيرولى حياتى راسا على عقب غيروها بجد خروجنى ووداونى دريم بارك الى هى كانت حلم انى اعرف اركب ملاهى وانا صغيرة كان حلم حياتى اعرف اركب مرجيحة مش اروح مدينة ملاهى واركب كل الالعاب كمان – من غير ما اطلب كان حلمى اوامر زى ما بيقولوا 4 سنين شفت بيهم دنيا على اديهم – كمية جدعنه متجمعة فى شلة بنات وولاد فى منتهى الجمال
حاجات كتير حلوة كانت بنا
كان لينا مكان للتجمع وهو الموتوسكل بتاعى كان مركز علشان الناس متستغربس بس كان دراجة بجارية مجهزة بتاعة معاقين يعنى ( الى هو انا يا جماعة ) ياما عطل وهما صلحو عملت حادث وهما انقذو – نكون متاخرين مثلا واخد من البنات حد معايا
مجموعة زى الحلم علمونى كتير اوى اوى – شفت الحب معاهم وشفت علاقات حب كانت بتتولد وتموت وانا بكون دايما سنتر للطرفين ومعايا التفاصيل الى محدش يعرفها
كتير بحبهم وكتير وحشونى
لكنى محظوظة انى انا الوحيدة تقريبا من البنات الى معايا صور كتيرررررر معاهم وفى الجماعة وفى الرحلات
حبيت اسجل حبى ليهم وهما وحشنى والرجوع للفترة دى كلها وحشانى
جريت الدنيا بينا واتفرقنا الى سافر والى اتجوزت والى اطلقت والى هاجر والى والى والى ..... وكتير بعد افتكر حياتى بنهم
عماد – عبد الحميد – محمد قطب- هيثم – محروس – مصطفى – هند – نانسى – هالة – عبير وحتى حارس الامن الصول عبد الله هو عجوز دلوقتى الى فى جامعة حلوان اكيد هيكون عارفه وطبعا اكتر الناس الى معايا على البوست من جامعة حلوان
حبيت اسجل البوست دا علشان يكون حاجة توثيية لمرحلة من حياتى بحبها
سواء حد علق عليه او محدش علق مش هزعل لان دا مرجع ليا اناااااا
بحبهم اوى
13 comments:
السلام عليكم
دي اول زيارة لمدونتك واول تعليق كمان
ويارب تعيشي وتفتكري واللي جاي ان شاء الله احسن من اللي راح
كل سنة وانتي طيبة
السنين بتمر بسرعة افتكر اول ما بدخل الجامعة بحس اني امام بترينه عرض ملابس اشكال و الوان بتفرج طول الوقت
اما سنين العمر بالجامعة كانت اجمل ايام افتكر محاضرات دكتور زين قبلها كنا بناكل شندوتشات فول من الملك الصالح من عربية بس كان جميل و الباذنجان و بندخل المحاضرة فايقين بالرغم من كدة كان له
كلمة دايمة في محاضرة الساعة 8 صباحا انتوا وكلين ايه على الصبح كنا بنبص لبعض و نضحك .
و ايام محاضرة دكتورة نوال الدقيقة بتمر بضمير كل شوية نسال عن الساعة و كل ما نقول هتخلص تقول بل و ننتقل الى نقطة اخري النقط معاها مكنتش بتخلص
كانت انسانة جميلة بعشقها و بعشق رقتها و كمان صحابي و ابن عم احسان صاحبتي.دة كان المكان اللي كان فيه مراية بالجامعة و علشان مش كل شوية نقول ادام احمد زميلنا اننا رايحين عند لابن عمها و من تكرار الكلمة ناس افتكروا ان في علاقة ما بينها و بينه طبعا اضطرينا نقول هو مين ابن عمها
القسم و اساتذته ومعيدية كنا ،اسرة واحدة جميلة و علاقتنا ببعض اجمل منهم مازالت العلاقات باقية و منهم من بقيوا في ذاكرتي فلم انساهم ابدا
تحياتي اليهم فهم اجمل من بالجامعة
و طبعا اصدقائي اللي قلبولي الفرح هزار و ضحك و نسيت العريس خالص افتكرت اني عاملة ذي الاطفال كاننا على رصيف كافتريا فرحة بالضبط في الاخر عملت عروسة وهديت شوية
ايام جميلة العشرة فيها دامت للابد
ساهر شكرا لمرورك الجميل ونورتنى وهستناك تانى
وكل سنة وانت مليون طيب وبالصحة والسلامة
وايامك انت كمان تكون احسن واحسن
همسة يا جميلة الجامعة وايامها على فكرة انا كتير كنت بعرف عن الكلية بتاعتكون من ايمان وتقريبا متابعة الدنيا معاكو كان الفاضل اقدم عندكو بئا
بس ياستى خالتى فى تجارة مع العيال اصحابى وعلى راى المثل
ياحلو يالى فى تجارة كل معرفتك خسارة وكل سنة وانتى طيبة يا قمرة
صديقتى الحبيبة فيفى ...آه أيام الجامعة
أحلى حاجة كانت فيها محاضرات د.زين
اللى كانت عاملة زى الشكبة العنكبوتية...بيتكلم فى موضوع وفجأة نلاقيه دخل على لينك تانى
بيقول على نفسه مدرس فاشل بس بصراحة كنت بفهم جدااا..وناس تانية كانت بتتلخبط وكنت استغربهم أوى...
وساعات استغرب نفسى
تحياتى وحبى
فعلا اجمل ما فيها محاضرات دكتور زين محاضرات عن علم الحياة اتذكر محاضرات الحيوانات التي قال لنا فيها ان الانسان بداخله صفات من حيوانات فهناك الذئب و هناك الاسد بقوته و هناك الفيل بضخامته و هناك صفات لحيوانات كثيرة يمكنك ان تتناولها في حديث واحد فحسب الموقف يتقمص الانسان صورة الحيوان
و دعانا ان نعبر عن صفات الحيوان الذي بداخلنا او الطيور
وقد بدا هو كي يزيل عنا الاحراج و تحدث بصفة الاسد و الزرافة رائع عندما تحدث وجدته و كانه يوسف وهبي تمثيله رائع جدا
هذه هي المحاضرة التى لا انساها ابدا و محاضرات د. عماد عيسي الاخ الاكبر ابو عمر حبيبي الصغير
طبعا انتي عارفة اسرتنا الصغيرة بالقسم كم هي رائعة و الكلام عنها هيطول و لكن هذه الايام شكلت الكثير بداخلنا
همسه حب
ايام الجامعه او نقول ايام الدراسه بصفه عامه ايام محفورة فى جسد وعقل وفكر كل واحد فينا بتعدى ايامنا وتمر بنتفرق واللى واللى زى ما قلتى بس بتبقى فى القلب ذكرى الايام الحلوة
تعيشى وتفتكرى وتغنى صيف وشتاء وما تبقاش بس اغانى شتاء
a_zaitoun@yahoo.com
anashayf@hotmail.com
محمد
السلام عليكم. أختي العزيزه علينا كلنا والقريبة من قلوبنا والغاليه اووووي عندنا
انا مش هعلق كتير على موضوع ايام الجامعة لأن طبيعي اي حد كان معانا في الجروب بتاعنا أكيد هتكون افضل سنوات عمره اللى عمرنا ما هننساها ابدا لاخر العمر بكل ما فيها من حلو وحلو لأن مكانش فيها حاجه وحشه والحمد لله.هي بس حاجة كنت عايز اقولك عليها لو فكرتي في الجروب واحد واحد هتلاقي انسجام وتوافق سبحان الله مكانش في اتنين متشابهين ومكانش في اتنين مختلفين عارفة بالظبط زي لعية جبتها لحنين (بنوتي العسولة يا جماعة) عبارة عن منطر رااااااائع بس اجزاء بتجمعيها بتلاقي مفيس اتنين زي بعض او ضد بعض لكن الكل بيكون المنظر الجميل فكان كل واحد من الجروب له شكل وطعم ولون جميل وكلنا مع بعض كنا احلى جروب وكنا مميزين بالمنارة العالية الغالية اللوحة اللى من غيرها مش هتعرف تجمع المنطر بتاع لعبة حنين في كانت الاساس وما زالت حتى الان والله انا ما بعرف اي اخبار ولا بطمن على الجروب الا منها فربنا يا رب يخليها دايما لينا.واسف لو كنت طولت شوية واسف انى معرفتش اعبر عن اللى جوايا وشكرا ليكي يا فيفي على فكرة المدونة واتمنى تكون سبب في لقائ الجروب ولو بالرسايل وبرضو تكوني انت صاحبة الفضل كالعاده.
سلام يا جمــــــــــيل
عمااااااااااااااااااد يا رفيق الدرب
انت من أفضل ناس عرفتهم
انت انسان ليك فضل عليا من يوم ما عرفت انت كنت معايا ايام الجامعة لدرجة انى مكنتش بقلق من اىحاجة ممكن تحصلى كنت مدوب مسافات كتيرة اوى فكنت مش بتحرج منك اسالك اى طلب او اى خدمة لانك دايما سباق
هفكرك بكام موقف
فاكر لما البنزين خلص من الموتوسكل وفضلت تشفط بنزين من عربية واقفة وعبد الحميد واقف اشراف وبيتأمر
فاكر لما روحنا اهند وهى عاملة حادثة ومعانا ورد الناس افتكرت ان حد جاى يتقدم لهند
فاكر لما المتوسكل اتقلب بيا وانت روحت تجيبه انت وقطب والموتوسكل كان بيمشى يمين بس
لو كنت ناسى افكرك
قيقي جتني فكرة جميلة يا رب نقدر نعملها وانت عليكي عامل كبيييييييييييير فيها نفسي نتفق على يوم كل الجروب نتقابل في مكان عام وكل واحد او واحدة يجي بالعائلة والاولاد وليكن يوم 8/8/2008 علشان مايتنسيش وانا هكون اول واحد حتى لو هنزل مخصوص لليوم دا.شوفي وجربي تكلميهم انا عارف انها صعبة جدااا بعد ما االحياه اخدتنا كلنا في متاهات كبيرة لكن مش مستحيل خليها كأنها خروجة فسحة لكل واحد ويا سيتي خليها حفلة عشاء على حسابي يلا محدش واخد منها حاجة وتكون في مكان محترم اي مكان وليكن دار من دارات القوات المسلحة ( هند بقا تخدمنا في الموضوع دا ) ابا كان المكان المهم نتجمع و تكون قاعدة عائلية رااااااااااااائعة.
جربي وقوليلي ولو نجحتي فيها هتكون الحفلة دي لتكريمك ونجيبلك درع الصداقة العالمي (ايه رايك جامدة دي صح)
سلاااااااااااام ومشتني ردك يا جمـــــــيل
على فكره انا موافق على فكرة عماد بس انا هنزل يمكن من يوم 8/9/2008 لذلك ياريت تكون الميعاد متوافك مع الجميع و كذلك ديه مشكلة الغربه الايام ديه محديش يقدر يجمع الناس كلها فى يوم واحد لظروف الحياه بس صدق هجيلك انا و مراتى و عيالى و هنتغدى عندك يادى الخساره يا اولاد
انتم فين خلاص على الفيس بوك فقط عبدالحميد
انتم فين خلاص على الفيس بوك فقط عبدالحميد
على فكرة الجروب كله وحشنى عبدالحميد
Post a Comment