رمضان دا يا جماعة زمان ايام المدرسة كان ليه جو تانى
الترتيب كالتالى
سحور - صلاة فجر جماعة والإمام الاب فى المنزل -المدرسة الصبح وطبعا كلنا رايحين نايمين - نرجع على العر نصلى ونام شوية ونصحى نلاقى ماما مخلصة الفطار - فاضل السلطة الطيبة الى بعملها وبصب البلح فى الكوبايات - نفضل نتحايل على عم الشيخ المؤذن ينجز علشان يقول الله اكبر ونشرب ونتبارى اننا ندى بعض بلح علشان ناخد الثواب بتاع افطار الصايم
ومع الفطا بنكون مشغلين الكارتون على القناة التانية وشوية برنامج المنوعات الى كان بيختلف سنة من سنة وبعدين فوازير رمضان الى كانت مقدسة وبعدها الف ليلة وليلى قصة كل ليلة .. وشوية والعشا تأذن نجرى نصلى ونصلى التراويح ونرجع نذاكر شويا مع اختلاس بعض النظرات للمسلسلات التليفزيونية
وبعدين على الساعة 12 ننقلب ننام علشان نقدر نصحى للسحو
وهكذا
30 يوم بنفس الشكل ولا ملل تماما
ومن الحاجات المميزة لشهر رمضان كمان زمان وفى سكنى القديم مدفع رمضان الى ولاد الحتة يفضلو يضربوه فى الحيطة ساعة الاذان
وكمان بعد صلاة العشا الدورة الرمضانية الى كنت بشوف ناس عمرها ما لعبت كورة بتلعب فى الشهر دا
دى زكرياتى العريضة عن الشهر الجميل
لكن تفاصيله اجمل بكتير
يوم الوقفة وانتظار دا الافتاء انو يقول بكرة رمضان علان نجرى نجيب السحور والزبادى ياجماعة مهم جدا الزيادى فى رمضان وتقريبا مينفعش سحور من غير زبااااااااااااادى
اما بئا اخر الشهر محدش يقول الدقيق والسمن والبسكوت والبيتى فور والغريبة والذى منه
دا غير الترمس الى بيتحضر ليوم العيد محدش ينسى
وااااااااااه من يوم وقفة العيد لما كنت صغير كان ان البنات تروح الكوافير دا شئ اساسى وكأن العيد مش هينفع يجى غير وانا عاملة شعرى فى لاكوافير ليه مش عارفة
المهم الدنيااااااااا دى كلها اتغيرت بس بفضل افتكر فيها وبكون مبسوطة
لكل حبايبى وكل الى هيقروا البوست الطيب الرمضانى دا كل سنة وانتم كلكم طيبين ومتنسونيش بالله عليكم فى الدعاء
لحببتى -ايمان - ودكتور زين - وايه - وهمسة- نصر - واحمد شقير - وروز ولكل الى اتعاملت معاهم فى المدونات والى كانت دنيا جديدة عليا بس جميلة..
13 comments:
ذكريات جميلة هن رمضان من بدايته لنهايته
كل سنة وإنتي طيبة ورمضان كريم وربنا يتقبل صالح الأعمال
وأنتي طيبة يافيفي وفي طاعة دائمة وانتي كمان متنسينيش في دعائك بس اجتهدي فيه كتيييييييييييييييير رمضان كريم ويارب يبلغنا ليلة القدر
تحياتي ياجميلة
آية سعودي
كل رمضان وأنتى أجمل وأطيب وصاحبتى طبعا
وكل رمضان ولنا ذكريات جميلة مش بس بتاعة زمان ...وليا عزومة عندك زى كل سنة بس الاكل مسلوق المرة دى إنتى عارفة اللى فيها
كل الحب والمودة
كل سنة وانتي طيبة
ياه ايام رمضان جميلة و ترتيب اليوم انا من هواة نزول السوق اول يوم و شراء القطايف و الوقوف في المطبخ و عمل العرقسوس و السلطة و قبل المدفع بثواني اقف اشوف الناس وهي بتجري علشان تلحق المغرب من البلكونة و بعد الفطار تامل ان كلنا بنعمل نفس الشىء في نفس الوقت
كل سنة و انتي طيبة انتي نسيتي بوجي و طمطم و بكار و ظاظا و جرير ليه انتي مش بتشوفيهم
لو عايزة تعرفي طعم رمضان انزلي السيدة زينب انا كنت هناك اول امبارح جو تحفة بجد
رمضان زمان لسه موجود بس في المناطق الشعبية
رمضان كريم
همسه حب
تسلمو يا اجمل ناس عندى وبحبكم وبشكركم انكم بتفتكروا تعدو علياااااااااااااااا ومبسوطة اوى انكم معايا فى رمضان دا وهنتقابل مع بعض تانى كتير فى رمضان على البوست
كل سنة وأنتى طيبة
أعمالك كلها جميلة جدا جدا
من مجدى البندارى
الى استاذتنا الفاضلة
أولا كل سنة وأنتى طيبة
ثانيا كل سنة وأنتى طيبة
ثالثا دايما بنتعلم منك العناد
والديكتاتورية فى الفكر والآدب بمعنى أننا بنكتب اللى أحنا مقتنعين بيه واللى الناس لازم تفهمة
وأفكارنا لازم الناس تقرأها ووتفهمها
لازم يحسوا بالفرق بين الفكر العادى والفكر الآخر أنتى الفكر الآخر اللى لازم يوصل للناس
تحياتى لكى ولهذة المدونة الجريئة
قرأتها قبل ذلك ولكنى لم أعلق عليها
تحياتى مجدى البندارى
تحياتى لاستاذى ومعلمى استاذ مجدى البندارى
اتعلمت منك كتير
وخصوصا المتابعة انت هايل بجد وانسان ممتمع وجميل
وانت حد فرق كتير فى حياتى وفى دماغى
بشكرك على قبولك صداقتى
كل سنه وانتى طيبه يافيفى وانا مش لاقى كلام اقوله غير انى اقولك الله عليكى وعلى كلامك اللى بيفكرنا بايام زمااااااااان معاكى محمود
dakadosy
رمضان جميل
ورمضان كريم
ورمضان حليم
ورمضان أجمل وأحلى مع فيفى
مشاعر رمضان موجودة فى المدونة
وأيام المناطق الشعبية اللى هى أيام رمضان
موجودة فى المدونة
بعد الفطار حسيت أنى عايز أروح لاى منطقة شعبية
لقيت نفسى بأروح للمدونة بتاعتك
بأشكرك أنى خلتينى أروح لرمضان
مجدى البندارى
العزيزة أغاني الشتاء
قلبتي عليه كل المواجه بتاعت رمضان اللي فات واللي قبله واللي واللي..بس بجد أحلى تقليب.. إيه كنتي بتقلبي في طبق السلطة قبل الفطار ولا رز بلبن..كل سنه وانت طيبه ياصديقتي الصغيرة وتذكري دائما أن الفن والجمال وحتى العلم هو إدراك التفاصيل الصغيره، وهو ماوجدته في لوحتك البانورامية الجميلة
كل سنه وانت طيبه ياقمر
وانت طيب يا دكتور زين وحاسة انك بتمنحنى كل مرة تعلق فيها على كلامى البسيط وسام كبيرة اخاف اكون مش اده
شكرا ليك يا دكتورى الذى لم احضر معه ولا محاضره ولكنى تعلمت من سيرتك العطرة
مجدى زميلى واخى الفاضل مرورك اضافة ليا ورايك جميل بس انا عارفة انك بتعزنى وهتتحيزلى ومالو دا زى الفل وبعدين لو رايح اى منطقة شعبية افتكر اختك ويارب اعرف اجى معاك ولو حتى على الورق تحياتى..
Post a Comment