قلمى العزيز

طالما فكرت فيك .. فكم عانيت لكى تصل أن تكون بين أصابعى .. وكم من المرونة أنت أن تصبر على هفواتى وجنونى . كم ألقيت بك بعيدا ثم ندمت وأخذت بك مرة أخرى . وكم نسيتك فى حقيبتى واستبدتلك بأخر ثم عودت إليك . وكم أخذك منى عنوة بعد الاصداقاء وجاهدت كى استرجعك مرة أخرى .




وكم شاهدت دموعى وأنا اكتب بك أوجاعى وآلام قلبى التى حرصت دائما أن لا يراها غيرك. وجلست معك كثيرا أرسم قلوب وبها حروف احبتى ..وذهب أحبتى وبقيت فلوبهم فى قلبى وفى رسوماتك ..



وفرحت عندما رسمت بك أول وردة لانى دائما ما كنت أفشل فى رسم الورود ولكنى فى نفس الوقت أحبها .



ورسمت بك عيون كنت أعتقد انها عيون حبيبى . ولكنى أكتشفت أنى لا أجيد رسم العيون .. لأاننى وجدت أن عيونهم تشبه بعضها البعض بنفس قسوتها وغدرها .



فشكرا لك قلمى أنك تحملت معى كل هذا



فلك شكرى وامتنانى



18/4/2011

انا مش هكون سلبية تانى خلاص

طول ما انا صح ومغلطش فى حد مش هقول أأأأأأأأأأأأأأأأأأسفة ابدا

والى يزعل يشرب من البحر

قلبى والشتاء

عندما تتجدد بنا الحياة فى كل لحظة نعيشها بين ظلام ونور وبين الشمس والدفا وبين الامطار والاعاصير هكذا هى قلوبنا عندما يشق الحب طريقه إلى اعماقها نشعر دائما بالدفء والسريان الدم فى العروق وتتحلو نبضات القلوب إلى دقات طبول الانتصار على الوحدة والخوف والملل ولتعلن انتصارها على بردودة وجفاء الحياة ولكن لابد وان تأتى الاعاصير والامطار لتطفئ حرارة القلوب المتوجهجة وتوقف دقات الطبول لتعلن بصوتها الخاف الحزين عن نهاية منتظرة لكنها أتت اسرع مما كنا نتوقع انا اعلم انك مثلى تشعر بمرارة وألم ولكن سنكون أغبياء إذا توقعنا من الحياة افضل من ذلك فالحياة لها قوانين من يخترقها يخسر آشياء كثيرة وانا وانت لا نقدم على الخسائر لا نستطيع ان نتحملها ولو جازفنا بالخسائر سنكره بعض يوما فكن صديقي وتذكر لى اننى يوما دخلت بحياتك وصنعت بها ألوانها لن تنساها ابدأ وانا سأتذكر دائما انك كنت يوما كل شئ وكل لحظة
سنكون ذكرى تضاف إلى عالم الذكريات الذى يزداد يوما بعد يوم طالما ينبض القلب ويأتى الشتاء ببردوته وامطاره ويأتى الصيف بحرارته ودفئه ..

حياة بطعم تانى

حياة بطعم تانى دى مش اسم فلم ولا قصة قصيرة
بس كل الحكاية انى عاوزة اخلى حياتى فيها حاجات جديدة واهتمامات جديدة ليها طعم مميز اهتم اكتر إنى ازود من اهتمامتى وقدراتى العملية والمهارية اتعلم اى تقنيات جديد اهتم بالاجانب الروحانى شوية انا حاسة انى بعدة عن ربنا وعاواه يساعدنى انى اكون مستقرة نفسيا لانى حاسة انى مشوشة وتعبانة جداوعاوزة كمان اتواصل اكتر مع اهلى وفيه فرصة كبيرة فرح بنت اخويا ودايما فى المانسبات العلاقات العائلية بتذدهر وتنتعش وكمان عاوزة اكون اكثر جرأة فى خط سير حياتى وعلاقاتى مع الناس وتحملى للمشاكل حاسة انى شوية ضعيفة فى مواجهة المشاكر ودايما بحاول مدخولش فيها ودا فى حد ذاته حاجة مش كويسة
عاوزة احاول كمان اظبط ادوات حياتى علشان تساعدنى انى اعيش حياتى بشكل افضل شوية
وكمان بحاول الفترة دى اتوجه لانى استتفيد من وقت فراغى انى اعمل بعض الاشغال اليدوية البسيطة حتى لو مكنتش حلوة اوى يعنى بس بخرج فيها طاقة مش بطالة
يعنى يمكن كلها حاجات عادية وبسيطة من وجهة نظر ناس كتير لكن تعنى ليا الكثير

مسافرة من حياة البعض

احينا نلتقى بإناس فى حياتنا ونتعامل معهم قد لا نرى منهم كل الجوانب ولكن فى لحظة الفراق نرى فى عيونهم ونبرة صوتهم حزن خاص يحاول ان يتوارى خلف بعض كلمات الوادع وعندما تقول لهم فى نهاية اللقاء لا إله إلأا الله تعلم وقتها انك بالفعل مسافر من حياتهم .

واحيانا اخرى وانت فى طريق الحياة قد يصتدم بك احد الأشخاص وتبتسم له ويبتسم لك وفى اليوم الاخر .. وانت فى طريقك للحياة كعادتك كل يوم تراهم .. وتتوالى الأيام بنفس الوتيرة حتى تعتاد وجودهم فى الطريق وبالاعتياد قد لا يلفت انتباهك وجودهم لان بالتعود تفقد الأشياء بريقها .. ولكن عندما يأتى يوما ويوما ويوما ولا نراهم فى الطريق وقتها . فقط نعلم اننا افتقدنا شيئا احتمال ان يستمر هذا الاحساس لعدة أيام ثم نعتاده مثل اى احساس نعتاد عليه ولكنه فى الحقيقة ، ان هؤلاء الناس سافروا من حياتنا ..

واحيانا فى ظل الحياة الشديدة الجمال والشديدة الألم فى ذات الوقت يظهر فى حياتنا إناس يشبهون النسيم عندما يتخلل شعر الفتاة الجميلة وعندما يلامس جسدها الناعم يشبهون ابتسامة الأطفال التى ليس ورائها هدف او مغزى يشبهون العناق عندما نحتاج إليه وفى الوقت الذى نعتقد اننا جزء من تكوينهم وهم جزء من تكوينك يختفون بدون اسباب من حياتك تراهم نعم ولكنهم يتجاهلوك فتتجاهلهم لرفضك من داخلك ان تكون مهمش فى حياتهم وتضع الف علامة استفهام ولا نجد إجابة عليها سوى انك سافرت من حياتهم ..

الرقص بالكراسى المتحركة

من كام يوم كنت بلف فى النت وبشوف ايه اخر حاجة وصلت ليها الانس الى عندها اعاقات حركية

كل ما ابحث بأى ألفاظ باللغة العربية للأسف لا اجد شئ

بحث باللغة الاجنبية لاقيت كل ما يخطر على البال

رقص بالية لراقصات وراقصين عندهم اعاقات

وعروض أزياء للمعاقين حركيا فتيات

لا وكمان مسابقة لملكة جمال العالم للاعاقات الحركية

وكراسى متحركة اشكال وألوان

لا وكمان ناس بتعمل حركات بهلوانية خطيرة

وناس كمان فاتحة مدارس لتعليم الرقص على الكراسى المتحركة

مممم يعنى كل حاجة ممكن الواحد يحلم بيها ويفتكر انو صعب تتحقق

لا موجودة ومتحققة وناس عايشين بيها كمان

ولكن للأسف الوطن العربى ومصر بشكل خاص ميتة فى المجال دا

لما شوفت كدا قولت عبارة سيطرت عليا وهى انى ميتة بس بتنفس

حاسة ان لو كانت حياتى فيها تسهيلات بشكل اوسع او انشطة تخرج الطاقات الكامنة ان الدنيا كانت هتختلف

ولكن عندى امل فى المستقبل ان الامكانيات تتوافر للأجيال الى بعد كدا علشان يعيشوا ويحلمو ويحققوا كمان

من غير جناحين

الأن وبعد طول غياب

من زمان اوى مجتش هنا ولا حتى فكرت وليه مش عارفة بئيت بعيدة عن التدوين وعن مدونتى الى هى كانت فى يوم من الأيام حاجة اساسية جدا انى اجى فيها

يمكن انا مش بتابع المدونات الاخرى ودا عيب خطير لانو من المهم المتابعة علشان انا كمان الاقى الى يتابع واوقات كتير ردود الناس هى الى بتخلى الواحد يفكر يرجع ويكتب تانى وتانى وتانى ..

المهم مش دا موضوعنا خالص

من مدة كبيرة وفيه كذا حاجة عمالة تلح عليا وهى معنى الحرية

حاسة انى عاوزة اكون حرة

حاسة انى نفسى اطير

اطير من كل حاجة تعبانى من ظروفى من المواقف الى بضايقنى

من الناس الى احيانا عملين انك مهم جدا فى حياتهم وفجأة يأكدو لك انك عمرك ما كنت مهم

اطير من إحساسى بالعجز إنى مش عارفة احقق احلامى البسيطة جدا

انى اجرى تحت المطر

أو ابكى بالدموع ادام حد

اطير من إحساسى بإنى مثلا نفسى ارقص لما اسمع مزيكا ومش بقدر

اطير من إحساسى بإنى نفسى اركب حصان واجرى بيه لبعيد اوى ويحضنى الهوى بلسعته ورقته ويطير شعرى ويرمى شالى على الأرض

أطير من إحساسى بإنى عاوزة ادخل اى كافيه واكون لوحدى واشرب نسكافيه واخرج من غير ما اكون محتاجة يكون معايا حد

محتاجة اطير من حاجات كتير اوى

أطير كمان من إحساسى بالصمت لمجرد الحفاظ على شعور الاخرين لكن احساسى انا عادى انو ينجرح وينزف ومحدش ياخد باله

ولكن فى النهاية الحقيقى ان مفيش طيران غير لو عندى جناحين

المسحراتى

اصحى يا نايم وحد الدايم رمضاااااااااااااااااااااااااااااااان كريم

اول ما نسمع الكلمتين دول بسرعة نروح نفتكر سيد مكاوى فى اوبرت المسحراتى

لكن انا مش قصدى كده خالص

قصدى على المسحراتى بجد وبجدانى

الى بيعدى على البيوت ويصحى كل واحد باسمه كان شئ رائع ان الراجل دا بيكون عارف اسماء أطفال المنطقة كلها

طبعا الجيل الحالى من أبناء المناطق الراقية ميسمعوش اصلا عنه غير لما يشوفو كرتون ولا حاجة فى التليفزيون وكمان بيفتكروها شخصية كرتوينة وهمية

كان من أجمل الحاجات عم المسحراتى وانا صغيرة اوى مكونتش متخيلة اصلا ان في كأن إنسان فعلا هو الى بيعمل دا وكنت ساعات بخاف وبفتكره عفريت بس طيب وبيصحى الناس علشان السحور لما كبرت حبة قولت لا دا مش عفريت دا صوت وبس وعارف اسماء الناس ما انا عبيطة وصغيرة بئا وكنت دايما عندى يقين غريب انو مش إنسان لانى كل ما اسمع صوته وأبص من ورا الشباك مشوفش حد لكن اسمعه صوته هو والطبلة ومن خوفى مكنش ممكن افتح الشباك

وكبرت شوية وعرفت ان مفيش الخزعبلات دى ودا كله من خوفى وبس وبيئت استنى عمو الطيب دا لما يعدى من تحت الشباك وينده اسمى انا واخويا واحنا صغيرن ويصحينى على السحور وساعات كمان كان بيخبط بعصايا كدا على الشباك

ومرت الايام ورا الايام ورا الأيام ومعرفش عمو الطيب دا راح فين مات صاحى عايش او بطل المهنة والله ما اعرف بس لاقيت فى سنة من السنين واحد تانى بيعدى لا الطبلة هى الطبلة ولا الصوت هو الصوت ولا حتى عارف اسمينا كنت مش بحب اسمع ولا صوته ولا طبلته وكأن عمو المسحراتى هو اول واحد سمعته وبس

وبدأت اصلا انسى فكرة المسحراتى لما كبرت

واتنقلت لسكن تانى وفى أول رمضان ليا فى السكن الجديد فوجئب بولد سنة ميتعداش ال 18 سنة معاه طبلة صغيرة وعصايا ومعاه واحد زميله كمان ومشين بيقولو اصحى يا نايم وحد الدايم رمضااااااااااااااااااااااان كريم

صحيت من النوم على انى بضحك والله والجميل كمان انهم معاهم ورقة بكل أطفال فى العمارة والعماير المجاورة وبيعدو تحت كل شباك وبيقولو باسم الاطفال ولو فى حد مش معاهم اسمه يبص من لاشباك ويحدفله ورقة بباقى الأسماء اد ايه الولاد بيكونو مبسوطين جدا

وبيفضلوا سهرانين لحد ما عمو المسحراتى الصغير ينده على اسمهم ويا ويله يا سواد ليله لو نسى اسم حد من الولاد

رمضان 2009

رمضان 2009

أى كان رمضان 2009 أو حتى 2090 فهو رمضان شهر كريم جدا عالعادة

زمان كان فعلا بيجى بتغيرات شاملة فى الاخلاق والنفوس والمعاملات

وكان بيكون من اللحظات الجميلة الى بتغير او بتققرب ناس من بعضها بيسعو بجد انهم يكونوا قريبين بغض النظر عن أى اسباب او خلافات اهو على الاقل بنلاقى سبب مقنع بعيد عن كل العنصريات يخلينا فعلا نتنازل اى كل واى حاجة ممكن تضيع معنى الشهر الجميل دا وبتكون فرصة حقيقة لمجاهدة النفس

المهم وباختصار

رمضان 2009 كان صدمة

والصدمة كانت فى رفض اخواتى من أبويا عزومة رمضان السنوية الى كانت انقطعت رمضان 2008 وبس لاسباب منها نفسى ودا الأقوى مش هكذب عليكم كان البابا مضايق الماما زيااااااااااااااااااااااادة عن اللزوم وكمان شبك معاها الموقف المادى وكالعادة البابا بكيل بمكيالين لو كان عاوز يعدى الموضوع بدون مشاكل كان هيهدى الجو بكلمتين ظراف وخفاف على القلب

ولكن وكعاداة البابا انو دائما وابدا بيحب يستثير حماسة وغضب الاخوات الكبار وبيحول الموقوف لموقف عدائى غريب وهما للأسف كمان بيحبو المواقف الى من النوع دا

المهم وكعادة الشعوب عندنا فى عيلتنا التهب الموقف ووصلت لزروته والحدة ولددت عناد وأفكار كتير منها المسموح بالتعبير عنه ومنها الغير مسموح بالتعبير عنه على الأقل من نحيتى لانى يكاد يكون كمان الجهة الوحيدة الى بتكلم واحيانا بشوط وزى ما ترسى دقلها

ومش هكذب عليك عبرت عن بعض من مشاعر الغضب تجاه موقف اخواتى وبابا لانى كانت دايما احلامى فى أسرة مترابطة وسعيدة

ولكن للاسف تقريبا انا الواحد عادة بيصاب فى الحاجة الى بيتمناها

طول عمرى نفسى اشوف لحظات حانية بجد من اخواتى تجاه بابا لحظات حقيقية لكن دايما حاسة انها زيف علاقة فاترة هى بيوافق ليهم على كل تصرف خاطئ بدعوة انهم ايتام ملهمش ام يعنى وان الى موجودة مرات أب فطبعا دا عامل شرخ نفسى

على عكس كل الحكايات الى كنت بسمها عن مرات الأب

مرات الأب دى شوفتها بتخبز عيش ادام الفرن وتبعت لكل بيت

شوفتها بتروح السوق وتشترى الخضار واللكرشة والكوارع وتنضفها ليهم

مرات الأب دى شوفتها هى الى بتحضنى اننا نصل الرحم معاهم مهما كانو مزعلنها

وحاجات كتير من هذا القبيل

ولما مبئتش تعمل كل دا بئت مرات أب لايغفر لها أى شئ ولكن كمان تعامل بشكل سخيف

لما كبرت وبدأت استوعب الوضع والحقايق دى بدات يكون ليا موقف واضح وجرئ بعض الشئ ساعات بيسبب ليهم قلق

ولكن نظرا لوجود الأب دائم التواجد فى صف الأبناء الكبار دائما قواى ضعيفة للاسف

ولكن اى كان سعيدة ان ليا موقف واضح

المهم بئا على الرغم من موقف الاب الدائم فى صف الأبناء الكبار

رفضو عزومة رمضان منه بكل وقاحة معلنة دون خجل من سنه او طلبه او حتى رمضان 2009

وكأن ليس لأى قيمة معنى لا ( الأب - الاخلاق - القيم -رمضان 2009 ) كمان للأسف

وبدأ الأب فى توسلاته التى اراه بنظرتى ويمكن ان تكون محدودة او خاطأة لاننى لست فى موقعه شعرت انها ذل وان هذا ناتج من اسلوبه الخطأ المستمر فى تسوية الخلاف او سياسته فى التنازل ليهم

وعدم قدرته على استخدام سلطته الشرعية كأب بان يقوم هو برفضهم ومعاملته بشئ من الحدة الى ساعات كتير بنحتاج ليها علشان نفوق من وهم او كذبة القوة الزائفة وان الدنيا بتاعتنا وبس

فكرت كتير هو فعلا لما يكبروا اولادهم هيعملو كده فيهم

وفكرت فحاجة تانية هى ولادهم فاهمة اصلا سوء العلاقات دى

ولا يا ترى ايه المبادئ المترسخة فى أذهانهم

ولكن مش هكذب عليكم حاسة ان فيه غشاوة اعلامية عن العيال مش عارفين تفاصيل كتير وساعات بحس ان الأباء والماهات عاملين الحجب الإعلامى دا وناجحين فيه اكيد

ولكن تبقى فى النهاية ان الحقيقة بتختفى كتير بس اكيد بتظهر فى لحظة يمكن مش فى الجيل الحالى بس اكيد هيجى وقت هيكون فيه أفضل من كده

رمضان 2009 امتداد لحالة من حالات الحرب الباردة للاسف بين قلوب الاخوات

وانتهيت افكارى بأن اصعب حاجة انى اكون مرات أب أى كان السبب فى النهاية النفوس هى النفوس والخلل النفسى موجود دايما مهما اتغيرت الظروف

عيد طفولة حزين جدا

فى غمضة عين

فى غمضة عين تتحول كل الاحداث لاشياء لم تكن فى الحسبان المشاعر تختلف والاحاسيس تختلف ونبراتالصوت تختلف .. ولكن لماذا وما السبب - هل هى حالةمن الفراغ المؤقت والحرمان الفائض فى ذاتالوقت أم هى حالة من المشاعر المتخبطة التى تبحث عن ملجأفوجدته فجأ أم هو حلم يعيش فى السراب وعندما وجدت بارقة أمل ظهر على استحياء .. ام ماذا هذا الشعووووووووور
اعتقد انه طالما وجدت كل هذه التساؤلات فهو اى أحساس سوى الحب لان الحب دائما معرفو انه حب !!!

أحاسيس زائفة رائعة

أتعجب للأحاسيس الزائفة المؤقتة التى تدخل حياتنا فجأة أحيانا بإذن مننا وأحيانا تتسلل إليا فى لحظة غفلة فتغير من شكلها واحساسنا بها بطريقة أو بأخرى لفترة فى تلك اللحظات الغافلة نعتقد انه حلم جميل لا نريد أن نصحو منه ونحاول ان نجد له الأعذار لكى يستمر طويلا ونحاول أيضا ان نوجد له المبررات لكى نثبت لانفسنا أنه ليس حادث عارض ولكنه حقيقة ثابته .

وحين يظهر ويتجلى أمره أنه لم يكن سورى لحظات زائفة رائعة ..

نستعيد أدراجنا للخلف ونحاول أن نصادر كل الأحلام والأمنيات المتبقية له فى السابق بالتوفيق ..

ونقول أننا كنا متوقعين له هذه النهاية بهذا الشكل الذى لم يختلف كثيرا عن أصدقائه من الأحلام الماضية باختلاف ملامح فارس الأحلام ..

ونحاول ان نتماسك بكل ما أوتينا من قوة أمام الأصدقاء الذين يعرفون الاحلام وحاولوا معنا تفسيره ولكننا كلنا فشلنا فى تفسيره .. ونحاول أيضا تأكيد توقع هذه النهاية لكى ندارى خيبة أحلامنا وأمنياتنا وندعى قول " بيدى لا بيد عمر "

الفراق

الفراق

الفراق تلك الكلمة الصغيرة التى تحوى الكثير والكثير من معانى الألم والحرمان

ولا يتبقى بعده إلا الدموع والشجن وبعض من الذكريات والدموع والألم

تلك الكلمة الضعيفة التى يلحقها صمت طوووووووويل يدمى القلوب

ودائما لانستطيع العودة إلى نقطة ما قبل الفراق فقد حدث واصبح امرا واقعاً علينا ان نتقبله بألمه وشجونه وأناته المليئة بالمرارة فى الحلق وبعض من الذكريات التى قد تزبل مع الوقت وتنكمش ولا يبقى عالق لنا فى الذاكرة منها إلا ما كان حدثا قويا له اثر فى عمق النفوس

انه لسنة كونية مثل كل الاشياء التى ياتى عليها لحظة فتنتهى ولا يتبقى منها سوى ذكرى

تلك هى الحياة دائما تحمل لنا فى طيات السعادة الكثير من الشقاء والالم

ليس لنا سوى ان نتمنى ان يهون الله علينا فراق الاحباب

وصايا لما بعد الفراق

وصايا لما بعد الفارق

يوما ما سيأتي الفراق
ويوما ما سنتألم
ويوما ما سيتفرع الطريق
ويمضي كل منا في طريقه


فإذا ما جاء الفراق يوما
فلا تنسى أن تسألني عن
رغبتي الأخيرة
ولا تبخل عليّ بإعلان
رغبتك الأخيرة لي
فكلانا مساق إلى إعدامه
وكلانا له حق الأمنية الأخيرة
قبل الموت


إذا ما جاء الفراق يوما
فسأمد يدي إلى الهاتف
وأدير نصف الرقم
وسأتذكر في النصف الآخر
أنّا قد انتهينا
وان للفراق علينا حق احترامه
وان كل الأصوات مباحة لي بعد الفراق
إلاّ صوتك


إذا ما جاء الفراق يوما
وجاء بعد الفراق العيد
فلا تنس أن تفرح
ولا تنس أن تضحك
ولا تنس أن تلبس الجديد
ولا تنس أن تزور ارض ذكرياتنا
وتقف فوق قبر الحب باطمئنان
وتقرأ عليه شيئا من شعرك
ولا تنس نصيبي من
ذكرياتك الحزينة
في ليلة العيد


إذا ما جاء الفراق يوما
وجاء بعد الفراق الحنين ندما
فلا تنس أن تغمس فرشاة الذكرى
في ماء جرحك الملون
وترسم وجه الحنين ضاحكا
ولا تحزن
ولا تجزع
إذا ما بدا لك الوجه
برغم الضحكة هزيلا
فكل الجروح بعد جرح الفراق
تبدو تافهة


إذا ما جاء الفراق يوما
وجاء بعد الفراق ليل مظلم أضاع قمره
فلا تنس أن تبحث عن القمر
في ارض الضلوع
فإن كانت الجروح هناك اشد وضوحا
فأعلم أن القمر هناك
في حنايا القلب مختبئ
إذا ما جاء الفراق يوما
وجاءت قارئة الفنجان
بعد الفراق إليك تسعى
فلا تصدقها إن هي قالت
أن في الغابة الموحشة
جنة حب خضراء سترافقني عليها
كذبها يا سيدي
ولا تكابر ولا تغامر
فبعد الفراق لا شيء يجدي


إذا ما جاء الفراق يوما
وجاءت قارئة الكف
بعد الفراق إليك تسعى
فلا تصدقها أن هي قالت
أن الحياة ضيقة كالكف
وان لنا فوق كف الحياة لقاء
كذبها يا سيدي
فليس أوسع من مساحة الألم
ولا أضيق من صدر الأمل بعد الفراق


إذا ما جاء الفراق يوما
وجمعني بك بعد الفراق طريق
وكانت تمسك ذراعيك
وكنت أتعكز ذراعيه
فلا تقل لها كنا
ولن أقول له كنا
فوحدنا نعلم يا سيدي
بأنا...وبرغم الفراق
مازلنا ..ومازلنا..ومازلنا


إذا ما جاء الفراق يوما
وفوق أرض الصدفة المؤلمة
التقينا
وسمعتك على البعد تقول
لعينيها أجمل قصائد الشعر
ولمحتني على البعد
أُراقصه ألما
فلا تقل لها كنت حبيبها
ولن أقول له كان حبيبي
وإلاّ..خسرتها وخسرته


إذا ما جاء الفراق يوما
وهُتكت بعد الفراق
تركة الحب المقتول
فخذ معك الضحكات
فليس لي بها بعد الفراق حاجة
واحمل الرسائل والكلمات والأحلام
وأبق لي الصور والذكريات
وبعضا من الأوهام


إذا ما جاء الفراق يوما
وأباحوا لنا بفضولهم
تشريح جثة الحب
وتشويه البقايا
فلا تفعل..ولن أفعل
بدأنا الحكاية قبل الفراق
أنقياء
فلننه الحكاية بعد الفراق
عظماء

منقول من شهرزاد

لمن لا يستحقونك

الكلام دا مش كلامى ولا أنا الى مألفاه وكتباه

الكلام دا جالى ميل من اقرب صديقة إلى نفسى وهى صاحبة مدونة شخابيط

استوقفنى بشكل غير طبيعى وقريته حوالى 5 او 6 مرات

وحسيت ان الكلام دا المبدع الى كتبه كتبه علشانى انا علشان يعبر عن حالة نفسى اوصل ليها فى معاملة بعض الناس بس مش ب عرف اكون بالقوة دى حتى لو الناس دى سببتلى الم قوى ومش عارفة ليه

مش هطول عليكم وهسبكم انتو تحكمة بنفسكم واعتقد ان الكلام دا هيلمس ناس كتير اوقات بتحتاج انها تكون بالقوة دى ومش بتعرف

المهم هسبكم تحكمو بنفسكم

****************************************

لمن لا يستحقونك

قل لهم بصوت عالِ
أنك نسيتهم .. وادر لهم ظهرك ، وأمضى فى الطريق المعاكس
فربما كان هناك .. إناس يستحقونك ..
قل لهم ..
إن الأيام لن تتكرر .. وإن المراحل لن تعاد .. وإنك ذات يوم .. خلفتهم
تمام كما خلفوك .. فإن العمر لا يعود إلى الوراء ..
قل لهم ..
إنك لفظت آخر أحلامهم .. حين لفظت قلوبهم . وإنك بكيت خلفهم
حتى اقتنعت بموتهم وإنك لا تملك قدرة بعثهم فى قلبك مرة اخرى بعد أن اختاروا موتهم .
قل لهم ..
أن رحيلهم جعلك تعيد اكتشاف نفسك .. واكتشاف الأشياء من حولك .
فاكتشفت أنهم ليسو آخر المشوار ولم يكونوا أخر الأحلام .
وأن هناك أشياء أخرى تستحق المثابرة وعشق الحياة .
قل لهم ..
إنك أعدت طلاء نفسك بعدهم .. و أزلت آثارهم وما حفروه
بأعماقك .. ونزعت سهامهم وطعنات خناجرهم وأعدت ولادتك من جديد ..
وحرصت على تنقية المساحات الملوثة منهم بك ، وإن مساحتك النقية ما عادت تتسع لهم .
قل لهم ..
انك أغلقت كل محطات الانتظار خلفهم فلم نعد نرتدى رداء الشوق
ونقف بانتظار محطات عودتهم .. نترقب القادمين ونتفقد أوجه المسافرين ..
ونبحث وسط الزحام عن خلالهم وعطرهم وأثرهم عل .. صدفة جميلة تحملهم إليك .
قل لهم ..
أن صلاحيتهم قد انتهت .. وان النبض فى قلبك ليس نبضهم .. وان المكان فى ذاكرتك ليس مكانهم .. ولم يتبقى لهم سوى الأمس .. بكل ألمه .. وأساه وذكراه ..
قل لهم ..
انك نزفتهم فى لحظات ألمك .. وأنك أجهضتهم فى لحظات غيابهم .. وأنك أطلقت سراحهم .
وأغلقت الأبواب دونهم وعاهدت نفسك ألا تفتح أبوابك إلا لمن يستحقون الاهتمام لهم .
قل لهم ..
لا تقل شيئاً .. استقبلهم بصمت فللصمت صوت يعبر عما تعجز الحروف والكلمات عن البوح به

غزة ..يا ظلام المتخاذلين

والله لم اكتب اليوم هذا الكلام رغبة فى الكام منى او إنى سأضيف لان الصور فى وكالات الأنباء تحكى وتحكى والصور اقوى صنوف الكلام وسأكتب باللون الأحمر لانه هو اللون المميز والرائحة المميزة لهذه الأيام

.. صراخ الأطفال ودموع الأمهات والنساء واشلاء .. والكثير والكثير من المشاهد التى ستسجل ختما على جبين الزمن بكيف يكون العدوان ومما معنى العدوان

اسجل اليوم لكى لا يمر على سنة او اثنين وانسى ما حدث

كنت اود ان يكون لدى صور لكل الشهداء

تجميع لكل القصص ولكنها كثروا

اليوم الخامس عشر على التوالى على قناة الساعة مازال العدوان مستمر

مظاهرات هنا وهناك اقوى مظاهرات بثتها التليفزيون كانت مظاهرات لندن

احداث ثانية واضحة انو إبادة لكل الأدلة على حرب الإبادة انهم بيضربوا المستشفيات والصحفين وعربيات الإسعاف والمسعفين

بيجمعوا الناس فى البيوت بدعوى تأمينهم وبعدين بيقذفوا البيت ودا دليل واضح على انو هو دا الهدف الأصلى للصهاينة

والأفظع انهم بيمنعو المسعفين والمنقذين من حمل الجثث شئ غريب ومريض

لقطة تانية على قناة الساعة .. وهى اطباء مصريين وبيكتبو تعهدات وأقرارات بأنهم رايحين غزة على مسئوليتهم الشخصية

واخر اتصالات بيجروها مع اهليهم الى بيتصل بأبو ويقولى ادعيلى انا حاسس ان دى احسن حاجة عملتها فى حياتى

وواحد تانى بيتصل بأبنه ويقولوا ذاكر كويس وادعلنا وادعى لاخواتك فى غزة ومتزعلش لو جرالى حاجة

ولقطة تانية للأطباء الى الجوازات بتاعتهم مش مستوفية وتم رفض سفرهم وهما بيبكوا لعدم قدرتهم على السفر

وكتير وكتيررررررررر

لقطة تانية .. مجلس الأمن الفظيع المريع الى مجتمع وفى نفس لققطة بأن الولايات المتدة بتقول انها هتشحن اسلحة لتل أبيب لان دا داخل ضمن اتفاقيات بين الولايات المتحدة واسرائيل وان الشحنة دى ملهاش علاقة تماما بالحرب على غزة وكأن كل العالم الى بتشوف الكلام دا متخلفين مش بيفهموا .. طبعا نو كومنت

مش عارفة اقول ايه والله

حسبنا الله ونعم الوكيل

وعزائنا الوحيد ان شهدائنا فى الجنة وقتلاهم فى النار

ويبقى الأمل فى الحق

مهما طال ليل الظالمين فإن الفجر آت

ليس بالخبز وحده تحيا نفساوياتى

احيانا وبدون اى مقدمات بتهجمك احساس فيظيع بالغربة مع ان معاك ناس كتير حواليك وبيحبوك بس مش واخدين بالهم منك

وفى نفس الوقت اه الظروف هى هى وكل حاجة هى هى بس مرة واحد بتتجمع ادام عنيك كل حاجة مضايقاك فى حياتك

وكان بركان مستنى الوقت المحدد ليه او لأ مش الوقت المحدد ليه ولا حاجة هو بس محتاج الظروف او الموقف الى بسببه ينفجر

بيكون اد ايه الوضع صعب - لما تكون كل الدنيا هاينه عليك وتحس انك هاين على الناس كلها

وقتها بتختلط الاوراق بين الحقيقة وبين التخيلات

هل انت بتتخيل كدا علشان عاوز يزيد شعورك بالألم وعلشان يتعاظم احساسك بانك مظلوم وان الدنيا تعباك ولا هو فعلا بيكون فى جزء من خيالك دا حقيقى

اى كان الوضع بس الدخول فى الدايرة دى مؤلم اوى لأقصى درجة وانك تحاول تخرج منها بردوا بيكون صعب جدا لأقى درجة

الأسوء فى الموضوع عدم القدرة على التعبير - عدم القدرة عن التعبير عن نفسك عن ألمك عن وجعك عن أحساسك

متعودتش اقول بحس انى بألم الناس الى حواليا - - أو انا ااصلا مش بحب فكرة انى صعبانة علىحد مش بحب الاحساس دا - ولكن بيفرق طبعا لو قولت وحكيت واتكلمت

افتقاد الإنسان لحاجات كتير مهمة فى حياته غير معترف بيها بيزيد من الأحساس بالألم

فيه كلمة جميلة شوفتها مرة وهى حقيقة " ليس بالخبز وحده تحيا نفساوياتى

دى كانت شوية فضفضة بينى وبينى

بعد غياب

وبعد غياب طويل ومن أول شهر رمضان مدخلتش وجتش ناحية المدونة مش عارفة ليه مخصماها

وحتى مش وحشانى دلوقتى بس لاقتنى هجراه اوى ودى عيب منى بصراحة لانها كانت فى يوم من الأيام كانت المنفذ الوحيد ليا فى التعبير عن حاجات كتير مش بعرف اقولها لحد

المهم اننا رجعنا

اللهم تقبل منا رمضان

مسلسل نور

ياترى هل غريب انى اكتب عن مسلسل او اغنية لفتت نظرى اوشدتنى

بتهيألى لأ

المهم مش هطول عليكو

الموضوع مش موضوع مسلسل معين او اغنية معينة بس الموضوع ان فيه شوية حاجات تقريبا احنا بنكون محتاجنها بشكل عام مش شخص بعينه

منها الحب الأسطورى الى بنسمع عنه بس فى الكتب والحكايات الأسطورية او الأرتباط الأسرى الى بنتكلم فيه حلو اوى لكن مش بنشوفه بالشكل القوى

والنجاح الى بالتأكيد هيكون ناتج من الحب والدعم والارتباط والعلقات الأسرية الناجحة

الثلاث عناصر دول تقريبا اتجمعو فى المسلسل دا

الحب الأسطورى الى اى حد فينا وهو بيتفرج يتمنى انو يعيش لحظة منه

الأسرة المتحابة القوية الى بتساعد بعض وتشد من أزر بعض

النجاح الى هو عادة بيكون محصلة طبيعية للعنصريين الحب والأسرة

وفى النهاية الصدق والراغبة القوية فى النجاح بشكل عام ودا الى حقق نجاح المسلس دا فى الوطن العربى

وانو كمان اشبع رغبات بل وطموح وأحلام الكثير من الناس بأنهم يتفرجو على حلمهم

لاننا مش عارفين نحب صح ولا نكون أسر بتحب بعض بجد

افتقاد الشئ اعتقد هو سر الانتباه ليه

رأى شخصى طبعا